Son 3 femnas que se son encontradas a Tolosa, al país de Cocanha. Doas son ligadas al collectiu Detz (Lila Fraysse e Carolina Dufau), es aquí que se son encontradas e qu’an començat de cantar. La darrèira venguda (Lolita Delmonteil-Ayral) una autra Gascona de nòrd qu’es ligada al collectiu de Guilhèm Lopez : lo CAMOM. Se son lançadas i a pas plan temps dins la canta polifonica, sens pretencion, ambe de frescum e per far dansar. Sonque per se far plaser e n’en donar. Las voses e los adobaments son plens d’originalitat amai los tròçes foguèssen coneguts. De timbres diferents, quauquas percussions e la salsa pren e las cambas començan de prusar.
En pauc de temps, an fat un pauc de camin. Las datas començan de sortir e un primièr disc de Cocanha ambe 5 titols ven d’espelir. L’estrena se faguèt dimècres passat a la Tuta d’òc de Tolosa.
Lo 18 d’abrial metèron lo fuòc al primtemps de l’Arribèra que la Caroliona Dufau n’es l’organisatritz. Viure al País i èra per una tema dedicada al BAL que vos presentarem aqueste dimenge 31 de mai.
Lo 21 d’abrial se ganhèron lo prèmi del public al Bijou de Tolosa dins l’encastre d’ « Osons » ont los artistas venon presentar lo lor trabalh.
Lo 13 de març, èran a la Maison Blanche de Tolosa. Normal donc qu’aguèssen fach dansar la Miquèla Obama dins aqueste vidèo plan originala. Las cal donc pas mancar. Tre dissabte 30 de mai « Chez ta mère » a Tolosa. Seran tanben al Festival Occitània de Tolosa.
Lo Benaset
