18 Oct

Massilia : 30 ans dins lo vent

Massilia, 3O ans de mar e de pastaga sens se negar, l’equipatge es de retorn amb un disc novèl qu’arribarà a bon pòrt lo 21 d’octobre.

99371223_oM’èri daissat dire que Massilia tornariá sortir una galeta. Me demandavi presque se l’afar ne valia la pena estant que lo darrier disc un pauc tròp experimental e produsit m’avia pas estrambordat. E que cadun avia trobat sa dralha de son costat.

Un d’aquestes jorns, lo disc es sul burèu, tot blu, simple, polit. Me cargui lo casque.

Guitarra escarraunhada, una mena de cabreta, quauquas panholadas : « Qui es-tu? Et vous, qui êtes –vous ? Nous, nous sommes de Marseille ! ». Totjorn las introduccions plan capitadas per enstallar quicòm.

E aqui que SI LÈVA MAI MA CANCON.

Sasit sul pic, prés de tira :

Ce qu’il nous faut

C’est tirer sur les rames

Vaincre le vague à l’âme

Contôler le bateau

Ce qu’il nous faut

C’est prendre les commandes

Ecouter les demandes …

Massilia es totjorn dins la plaça. Ritmica empeccabla, guitarras saturadas, son un pauc dur, voses plan enregistradas. Non, serà pas lo disc de tròp ! E granda novèltat : Massilia tòrna jogar collectiu. Gari, Moussu T, Papet J, son a cantar amassa sus cada tròç, a s’amusar, escambiar… TROIS MCs SUR LA VERSION, de que rescaufar totes los « congélos ». Un asagal de pastaga dins lo monde pissa-fret e fadassa.

1782147_693591537385059_6135725812371402954_n

Photo Facebook Massilia

Moussu T pren las comandas sus ES TOT PAGAT. Massilia mai que jamai dins l’actualitat, en presa amb la societat :

Il paraît qu’on a trop dépensé

Il parait qu’il faut tout rembourser

Moi l’argent je l’ai pas vu passer… 

Moussu T de barrar la pòrta :

Goldman Sachs USB HSBC nous ont tous cassés.


Arriba alèra un tròç pas acostumat JE MARCHE AVEC. Massilia en prisa ambe l’opereta, una mena de fals charleston, puslèu original. Dins un monde que va a fum, tremoladís, Massilia brancat sus un corent d’alternativas :

Tout part en vrille tout le monde ment

Vas-y débranche la solution vient en marchant…

Lo son es bon, travalhat, cercat…Bon equilibri e bon encadenament entre de produccion pus gròssas e los bons vièlhs ragamuffins.

MA VILLE RÉVEILLE-TOI una tchatcha plan del biais dels Fabulos Troubadors, una òda a la vila dubèrta, mirgalhada…Vigorós e eficaç.

Tot se passa plan, soi pas desacrancat, contunhi lo vitage per l’escala venenta.

Es un afar complètament derasonat mas sovent dins un disc, es lo tròç N°7 que me tampa e qu’estimi lo mai. Aquí LA RESPÒNSA ES DINS LO VENT. Debuta blues negre, la votz que tremola e s’esperlonga e lo ridim que comença. Qu’una intrò e qu’una cançon !Un raga plan pesuc que te pren, que t’empòrta :

A ton entorn l’espèr s’encabana

A ton entorn lo chaple si debana

Lo còr es lord e la fèsta s’engana

Ti vaquí lo peis dins la consèrva

Ti vaquí lo peis dins la consèrva…

Una pura jòia de poesia, servida sus un ritme prenent, d’adobaments simples e intelligents. Mas ara viés l’estèla dins tot aquela crassa.

1072398_694852930592253_5364817591436488138_o

Photo Facebook Massilia

Pas lo temps de lutrar e pantaiar. MASSILIA N°1. Un Massilia pus classic, las paraulas risolièras e plan trobadas e aquela envolada dansanta, enfachinanta :

Va ma cançoneta vòla

Lo viatge deis paraulas

Lo trin de Massilia

Mon trin s’arrestarà pas a l’estacion POURQUOI JE MORFLE. Pas francament convençut.

Estimi mai L’ELEGIT, un bon reggae negre que manda la salsa, esclairat d’un biais supèrbe per las guitarras de Blu.

Paure pòple l’annada si passa

Totjorn dins la nassa,

Crebat e e passit…

O bonne mère, e dire que lo Gaudin lor vòl remetre una medalha. Aquò farà la convèrsa ! Tant que li son, que li faguèsson escotar QUAND ON VIT CONNECTÉ. El que fricoteja ambe lo FN. Son numeric, un pauc rete, que t’obssèda e te fa passar de messatges.

Reportage Francetv sur le cours Julien à Marseille : JL Boudart, V.Danger, C.Despre, M.Samson


Pas cap de dobte, Massilia a encara de causas de dire, de repapiadas aprigondidas, de causas novèlas e lo plaser de partajar. TOUS CES MOTS ambe de loops ipnotiques, MASSILIA coma un far dins los funses rajoses e freges de l’epòca.

couv_2973Alèra lo batèu Massilia pòt contunhar son periple. La baie de Rio, celle de Shangai…E son estaca, lo pòrt, A MARSEILLE. L’equipatge a trobat son ritme pas francament de crosièra. A l’imatge de son titol « Massilia », lo disc es simple e essencial, un bon retorn als fondamentals que son ragamuffin, engatjament, partatge. Òm sentís que lo grop a tornamai l’enveja de caminar amassa. Me farà pas doblidar lo vent de frescum e la creativitat que fasián s’envolar la famosa 2CV. Mas me dona l’envaja d’anar encara partajar quicòm plan mai que musical en concèrt lo 23 a Tornafuèlha (31), lo 8 de novembre a Narbona, lo 13 a Tarbas…

Me triga tanben de veire cossi Camille Martel Mossur Yellow aurà esclairat aquelses 30 ans de Massilia dins son libre que sortirà ambe lo disc. Ne tornarem parlar dins lo jornalet de dissabte que ven.

Lo Benaset