20 Sep

Escòcia ditz de non a l’indepéndencia, Occitània se dona a Groland!

Alèra qu’Escòcia ven de se refusar l’indepéndencia, Occitània a donc causit de metre fin a sa non-independencia en se faguent annexar pel Groland

20140919_173850Aquel país celèbre pas mai resconegut qu’Occitània a son president e tanben un festenal de film Fifigrot a Tolosa. Dins aquel encastre e pel primièr còp, se faguèt una seleccion occitana « Gardarem lo Groland » ambe La Seria d’Amic Bedel e Julien Campredon. Per de que ? « Tout ce qui est à la marge nous intéresse. Tout ce qui n’est pas aux normes européennes ». Vaquí çò que nos diguèt Benoît Delépine qu’a plan estudiat la situacion : « J’habite à Angoulême et j’ai vu sur une carte que je suis juste à la frontière, aux portes de l’Occitanie…En pointillé, comme Groland ». Lo cal pas prene per un con. Michael Kael es jornalista.

20140919_173756E donc, aquel divendres 19 de julhet de 2014, dabant tant de generositat grolandesa, Occitània a consentit a s’ofrir a Groland país sens estat de l’absurd e del folastre. Valent a dire qu’Occitània es pas perduda. Lo president Salengro es arribat dins sa Jeep, plan aparat per una garda femenina gaireben « castrista » mas plan pegada contra sa pèl. Lo president de l’Ostal d’Occitània Joan-Francés Laffont un pauc gelós a pas fat de resisténcia. E convivencia occitana s’es encara un còp verificada : tapis rotge, aubada, blanqueta e…la Catinou. Salengro quitava pas de dire « va plan, va plan ».  La Catinou al Groland, i caliá pensar. Carles Moly  ne diu èsser plan fièr ! Lo maridatge s’es donc plan passat. Consomat o pas, es de mal dire. Aprèp son present de maridatge (un panieròt de cebas), Salengro s’es acontentat de dire : « Au moins, j’aurais vu votre oignon ».

20140919_174545Aprèp la ceremonia, lo president es tornat partir dins sa veitura. Als aplaudiments, a respondut per un « Vai ten cagar ! ». Tant d’emocion fariá presque doblidar que lo ser i aviá un autre eveniment a se fa petar lo ventre : los dos primièrs episòdis de La Seria. La sala de l’ESAV de Tolosa èra confla e espetada de rire. Sabèm pas encara se s’es ganhada una « amphore », (trofèu del Groland) mas solide que s’en tornarà parlar !

Reportatge France 3 Edicion Occitana B. Roux JP. Jauze P. Level M.P. Duvivier C. Pelhate


GROLAND’OC par france3midipyrenees

Lo Benaset