Pel primièr còp jos la Vèna Republica, una lèi a prepaus de las lengas regionalas foguèt adoptada pel Parlament.
« De fach, aquela lèi balha un estatut a las lengas regionalas. Es evident qu’es un moment istoric. » Gilabert Mercadièr, president dau Congrès Permanent per la Lenga Occitana, amaga pas sa jòia aqueste dimècres 8 d’abriu 2021: « Per un còp qu’avem una victòria, ne cau aprofechar! » Èra a l’entorn de 16 oras quora los deputats votèron definitivament la proposicion de lèi relativa a la proteccion e la promocion de las lengas regionalas, portada pel deputat breton Paul Molac. Alara que lo govèrn s’èra opausat, sens succès, a dos amendaments que concernisson l’ensenhament de las lengas minorizadas, alara que lo grop LREM aviá anonciat son oposicion a l’adopcion dau tèxt (amb lo sosten d’un autre grop, aquel de La França Insomesa), la lèi Molac foguèt votada per una majoritat enòrma: 247 deputats contra 76. Un bacèu pel govèrn e mai que mai son ministre de l’Educacion Nacionala. Una resulta que pròva una division prigonda dins lo grop de la majoritat. « Una mobilizacion coma n’aviam jamai coneguda, dins totes los bòrds politics, reprend Mercadièr. Aquò demandèt de trabalh, mas tot lo mond obrèt. » Ancian inspector d’acadèmia, lo Roergàs explica qu’ara las lengas dichas regionalas an « un estatut coma patrimòni imaterial qu’es reconegut dins lo còdi dau patrimòni e dins lo còdi civil. » E ne balha un exemple, la senhaletica bilinga: « N’i a que trantalhavan, que disián « sabèm pas s’es legal ». Ara es clar : es legal. Tot parièr, ara se pot prepausar d’ensenhament en occitan de’n pertot. » Per mai de precisions sul contengut de la lèi, sus la portada dau vòte d’aqueste tantòst, avèm contactat tanben lo primièr concernit, lo deputat Molac. Dins las doas videos seguentas, podrètz escotar sas primièras reaccions.
