Membre dau grop Coriande, organizator del festenal « Trad’hivernales », Danís Galvier es tanben un autor. Ven tot just de publicar son primièr roman, « Dilà, entre doas ribas ».
Es lo vòstre primièr roman, de que vos butèt a passar a aquela fòrma?
Ai fòrça escrich de fòrmas cortas: de cançons, de novelas. Mas es una causa que me tafurava dempuèi un moment, de far viure los personatges per un moment. Lo fach de fargar de personatges, lor donar de carn, los far viure lo temps del roman, es una aventura fòrça interessanta. Es aquò que voliái e pensi que l’ai plan fach dins lo roman.
Aquel roman es dins un encastre vertadier, Somèire, vòstra vila?
Res es pas vertadier e tot es vertadier. Se passa a l’ora d’ara, amb lo mond de l’ora d’ara, amb de problematicas de l’ora d’ara. E se debana dins Someire qu’es pas exactament Someire, mas qu’es Someire. Es un roman que diriái un roman social, una mena de « thriller » social. Quicòm coma aquò. Generalament, lo mond qu’o legisson an de mal d’arrestar, raja coma Vidorle.
Es un roman social e tanben un roman d’afrontament?
Òc un roman d’afrontament mas tanben un roman de vida e de paratge. Un roman ont la comunicacion entre las generacions es interogada, ont i a un molon de solidaritat que se desvolopa, pasmens la vida es pas un long flume tranquille nimai. L’istòria se debana al entorn d’una filha venguda de Turquia, una Kurda, amb totas las problematicas qu’i son ligadas e que se mesclan amb de problematicas localas. Me semblèt interessant de trachar del rescontre entre noveltat e ancianetat, e sustot del rescontre entre los monds: los joves e los mens joves, l’alhors e lo local.
Qual es que s’afronta alara dins aquel libre ?
Repreni los problemas de l’ora d’ara, que son pas que de pretèxtes : lo mond que son d’aquí e aqueles que son pas d’aquí. E se vei que i a d’autras causas que tiran las ficelas, d’autras personas. Es la societat normala ont se tròban mond que se servisson d’aquela mena de causa per se’n metre plen la folhas. Mas çò francament important es de veire los gents que vivon al entorn d’aquò.
@Aquodaqui
Lo primier roman de Danís Galvier, « Dilà, entre doas ribas », es publicat en çò de l’Aucèu Libre
