Dijòus 15 d’octobre, lo Festenal Occitània de Tolosa presentava una serada rara, dedicada a las musicas d’inspiracion populara, collectadas puèi armonizadas e orquestradas d’un biais classic.
L’Orquèstra Mozart Tolosa Miègjorn-Pirenèus e la joina estela de l’art liric Anaïs Constans joguèron sus l’empont de Sant Pèire de las Cosinas de tròces musicals que foguèron l’objècte d’estudis etnomusicologics : « De musicians compilèron de cants tradicionals dins de montanhas o de valadas per exemple, enregistrèron aqueles cants e los tractèron d’un biais « sabent » per los balhar a l’art liric e a la musica classica » nos explica Claude Roubichou, cap d’orquèstra, flaütista solista a l’Orquèstra Nacional del Capitòli de Tolosa e l’un dels fondators de l’Orquèstra Mozart Tolosa Miègjorn-Pirenèus.
Al programa de la serada : « Las nuèits d’Espanha » de Deodat de Severac, « La Rapsodia pels aires del país d’Òc » de Pau Lacomba, « Aprèp un sòmi » de Gabriel Faure mas tanben « Los Cants d’Auvèrnhe » de Josèp Cantaloba, de « Cants d’Auvèrnhe » que balhèron l’escansença d’ausir de musica lirica cantada en occitan per Anaïs Constans.
Eissida del Conservatòri de Tolosa e del CNIPAL de Marselha, premiada dins un fum de concorses internacionals, nomenada « Revelacion Artistica Lirica » a las Victòrias de la Musica en 2015, Anaïs cantèt en occitan aqueles cants tradicionals d’Auvèrnha collectacts per Josèp Cantaloba entre 1923 et 1930.
Una còla del Jornalet èra presenta per las repeticions mas tanben per aquel concèrt d’excepcion.
