A l’escasença dau Tolosa Game Show (2 e 3 de decembre), se fai una presentacion de la lenga d’òc a travers de la cultura geek.
Sébastien Laurens, co-fondator dau TGS
« Lo Tolosa Game Show (TGS) es un eveniment que presenta mantunas culturas: la japonesa amb los mangas e los jòcs-videos; l’americana gràcia aus comics. Me semblava logic de daissar un corner [sic] a la cultura locala. » La filosofia de Sebastien Laurens, co-fondator dau salon geek es tràs que simpla. Pasmens, la plaça facha a l’òc dèu pegar a l’esperit de l’eveniment: cau demorar dins una demarcha ludica, e pas tombar dins una presentacion universitària que fariá fugir lo public. L’occitan comencèt d’aver una entrada l’an passat, amb lo grop Aital Aital, programat per un pichon concert. Ongan aquò se confirma. Lo duo Tolosan es de retorn, acompanhat per una autra formacion, Feràmia, e cadun adaptèt en òc un generic de dessin-animat (se parla notadament d’una version de « l’Inspector Gadget »).
https://youtu.be/ogvBN3IbzUY
Abans que los musicians monten sus l’empont, lo public a drech a una sensibilizacion cap a la lenga nòstra menada per un pichon colectieu de quatre personas. Causiguèran de presentar las iniciativas en occitan dins l’univers geek. « I a ben mai de mond que çò que se podriá pensar que mesclan l’occitan aus jòcs-videos, aus fims e autras referéncias, conta Danís Chapduèlh – autor d’un blòg que reprend aquèu univers (lo país polit daus potonors). Amai me pensi qu’aquèu encontre es naturau. Los geeks son passionats per d’imaginaris divers, e dins la nòstra societat, la cultura occitana es imaginària. » Lo Danís s’activa dempuèi d’annadas dins aquèu domèni, realisèt notadament en 2013 lo doblatge d’un episòdi de la seria culta South Park en òc (Scott Tenorman deu crebar). S’ataquèt tanben a un autre simbòl generacionau, los pokemons, que faguèt la revirada daus noms de las doas primièras generacions (mai de 300 personatges).
Lo trabalh de Dètz.tv, de Piget Prod seràn tanben mostrats au TGS, coma las cronicas « tòca-maneta » de Tristan Gahús. Tot aquò se debana los dos jorns del salon, los 2 e 3 de decembre. E es pas qu’una debuta. Tre lo mès d’abril, quora una version redusida dau TGS prend plaça, Sébastien Laurens a previst de contunhar la programacion occitana, amb benlèu una conferéncia.
