09 Sep

Crozada d’uèi as Ais de Provença

Fa 800 ans e pr’aquò, i a quauques ressons duèi. Aquí tot l’esperit e la finessa de Crozada d’uèi e de son autor Patric Hutchinson. Dempuèi un parelh d’annadas, nos a acostumats a de creacions de nauta-volada. Aprèsta quicòm per 2018 e l’anniversari de la mòrt de Montfort. Mas deman e tanben lo dissabte 17, va organizar 2 jornadas sus l’episòdi famós del sièti de Bèucaire. En partenariat ambe l’IEO de las Bocas de Ròse e amb de conferéncias e d’artistas tals coma Mauresca e Jo Corbeau.

 

Provença se quilha contra Montfort

Patric Hutchinson es Escossés mas coneis Occitània coma son país. A, de longa, soscat e escrit sus la Cozada e donat mantuns espectacles. Lo darrèr parla d’un episòdi un pauc desconegut : lo sièti de Bèucaire de la mitat del mes de junh de 1216 a l’entorn del 28 d’agost de la meteissa annada. Lo moment ont los Raimonds (VI e son fils d’un quinzenat d’annadas a l’epòca Raimond VII) se tòrnan trobar a Latran (Roma) en 1215 e van obténer del papa Innocent III de poder retrobar lo lors dreches sus lo « Marquisat de Provença ». Van aprofitar que lo Lop i es pas per anar cap a Provença, ambe l’aduja de senhors -e de las populacions provençala de vilas vengudas autonòmas- per dintrar a Bèucaire. Montfòrt dintra a grand passes, alertat per son fraire mas Provença e los Raimond van téner e tanar los crosats venguts aganits.

De conferénças e un espectacle

Deman de matin, un ramelet d’especialistas seràn as Ais de Provença, dins l’encastre de las jornadas europencas del patrimòni. Aital Thierry Pécout, Felip Martel, Alem Surre-Garcia… L’afar s’esperlonga l’aprèp dinnar. Per mai de detalhs, podètz picar aicí. E puèi, dissabte que ven 17 de setembre, un espectacle aqueste còp ambe Mauresca, e lo Jo Corbeau, fondador de Massilia. De mancar pas. Lo Patric es a trabalhar sus un espectacle complèt per l’anniversari de la mòrt de Montfòrt. Se discuta per que siague prepausat a Tolosa ont lo lop moriguèt, 800 ans pus tard, en junh de 2018.

Entresenhas

https://www.facebook.com/crozada.duei?fref=ts

http://www.croisade-albigeois-2009-2013.org/

Lo Benaset