A 28 ans, Sofia Vissière es diplomada d’un BTS en comunicacion visuala e d’un Master Arts Aplicadas. Felena de l’escrivan Andrieu Lagarda, banhèt mainatge dins la cultura occitana, abans de s’alunhar de l’occitan a l’adolescéncia. Mas quand deguèt realizar un projècte per son Master, decidiguèt gaireben naturalament d’illustrar un tèxte de son grand, « Las Tres Pomas d’Irange», un conte occitan eissit de la tradicion orala. Una òbra que Sofia realizèt de tot en tot sens ordinator.
Photos du site www.sophievissiere.com
En seguida d’aqueste libre, rescontrèt l’escrivan Fèliç Daval que li demandèt d’illustrar dos libres pels pichons : « La legenda del grand Guindon » e « Legenda del Bèl Ramel » a las edicions Edite-Moi !
Puèi, contunhèt de trabalhar sus de libres occitans amb las edicions Letras d’Òc. Amb elas, illustrèt doas tampas e dos albums al format bèl : « Lo Capaironet roge » e « Lo Rei dels Corbasses ». L’illustratora tolosana a encara mantun projèctes amb l’ostal d’edicion de Joan Eygun.
Uèi, Sofia s’es associada amb d’amics : amassa an creat l’associacion « Le Canapé » e partejan lors burèus carrièra del Taur, a Tolosa. Vaquí lo reportatge del Jornalet del 31 de genièr que vos presenta Sofia Vissière e son trabalh.
Sirine Tijani
