20 Déc

Calandreta a la soca

Dins aquel tresen episòdi, los calandrons de Carcassona son a aprestar nadal de dabans las vacanças. Aqueste dijòus, las doas calandretas (Ciutat e Pech Mary) èran recampadas, pas luènh de 150 mainatges… Un nadal un pauc aboriu per elses que comencèt per la tradicion dels 13 dessèrts, una istòria contada e noirida per la Mirèlha Bras. Pas de pompa a l’òli mas de que s’onchar un pauc la garganta e se rescaufar. Mentre que Miquèl Decor faguèt cantar son monde, l’Alan Roch tenguèt en alèrta los pichons ambe sas envoladas contarèlas e que la Lisa Gros venguda de Gard apasimèt un pauc los mainatges ambe biais e doçor.

En fin de matinada, al son de « Cantèm nadal », los calandrons anèran tornar bufar sus una tradicion occitana : la de la soca. L’istòria vòl que l’ainat e lo captèt de la familha devián portar la soca cap a la chimenèia. Lo temps de dire la formula : « Bota-fuòc, cacha-fuòc, calènda vèn, tot bèn vèn que nos allegre e nos faga la gracia de veire l’an que ven, e se sem pas mai que siam pas mens ». Lo fuòc deviá téner cap a cap de l’an e las cendres de Nadal èran reculhidas lendeman e votadas sus la chimenèia. 

Mas aquí, lo fuòc èra dins la sala e la soca èra aqui per portar los presents. A condicion evidentament de dire coma cal la formula del cachafuòc. De mormolhs per començar ambe los pichons e de d’aprèp los crits dels bèlses a te desrevelhar una soca cussonada!

Bonas vacanças als calandrons, bonas fèstas e a l’an que ven per la seguida d’aqueste fulheton.

Lo Benaset

Reportatge France 3 : B. Roux O. Denoun P. Barguisseau F. Declercq S. Planchou

calandreta a la soca par france3midipyrenees

02 Oct

Rampèl per las escòlas occitanas a França 3

Viure al País es a cambiar. L’emission novèla serà pel 12 d’octobre. Demest las novèltats, de plaça per totes los que son a aprene la lengas dins las escòlas publicas o privadas. Un bais per nautres de socialisar la lenga e d’interessar los joves a l’audiòvisual.

Visuel VAPPer aquò far, avèm besonh de conéisser los projèctes pedagogics de las escòlas : viatges, classas verdas, escambis ambe d’autres, rescontre ambe de monde, descobèrta, correspondéncia, passejada, e patin cofin. L’idèia sería de venir filmar mainatges e professors en defòra de la classa. Sabèm tanben que d’unas escòlas an de causas particularas : un verdièr, un òrt, un bornhon, un talhièr especial…Volèm plan filmar aquelas activitats que son pas sonque escolaras. O alèra se s’agís d’un projèct particular, un trabalh sus de fèstas coma carnaval, podèm venir filmar tota la preparacion. . Aqui per Viure al País. Pel jornalet del dissabte, anam seguir la vida d’una escòla de còp en còp sus tota l’annada escolara.

E pel blòg que sètz a legir, venèm de fargar una rubrica novèla « Conta-Monde » que serà la vòstra per poder metre en linha los vòstres reportatges : fotòs, vidèos, escambis, dorsièrs. A vos de nos mandar çò que cal e serà publicat sul blòg per la nòstra equipa.

Esitèssetz pas a nos contactar per nos fa part de las vòstras prepausicions, de totas menas, an aquela adreissa blogvap@francetv.fr. Per de causas mai pesugas (fotòs, vidèos…) vos caldrà passar obligatòriament per wetransfer. Se pòt tanben escambiar e charrar ambe la pagina Facebook de l’emission VAP…

 

Sèm a l’espèra ! De còr e d’òc.

Lo Benaset