14 Mar

Biais sason 2 : Amb Antoinette e Georges en país Montalbanés

Vos sètz regalats en 2015-2016 amb la sason 1 de BIAIS. De saupre-far populars, una lenga naturala, amb una diversitat dialectala, d’imatges rete polits… La sason 2 s’en tòrna donc dempuèi dimenge passat. Se l’avètz mancada, lo blog occitan vos permetrà a cada còp de tornar fintar lo sicut ambe de causas en mai. Aquí donc lo primièr episòdi de la sason novèla amb Antoinette e Georges, la gravèra e los curbelets famoses.

Fòto : france 3

Fòto : france 3

Antoinette e Georges

Los podètz trapar dins un canton al nòrd de Montalban que se dís « lo Pelut », a la broa de la ribièra Avairon, precisament a Lobejac (Tarn e Garona). Tota la lor vida, curèron la ribièra per ne tirar de gravas. Antoinette arribèt dins las annadas 1920 per trabalhar a Caramaus (Tarn). Es d’origina catalana. La maire de Georges es d’origina italiana e visquèt als Estats-Units. Ont se tròba duèi la lor felena.

Fòto : france 3

Fòto : france 3

Duèi, Antoinette et georges son retirats mas la gravèra contunha ambe lo filh dins un autre endret. Cal precisar qu’es lo Georges que fabriquèt totes los utisses que veidretz dins lo reportatge, ambe de ferre de recuperacion. El tanben que sodèt las pèças en pus piètre per fabricar la joguina pels mainatges ! Tot aquò manca pas de biais !

Los curbelets

Es una mena de bresca fina que se tròba sus mai d’un airal. Mai que mai dins Tarn mas pas sonque. Lo nom ven de curbèl, un utís que servís per passar la sabla e far la tria. Lo grilhatge del curbèl se vei sul curbelet. E de curbelets, n’ia totjorn ja Antoinette et Georges. Ne fan de contunh, es un biais de far plaser al monde. Alèra l’utis caufa sovent al pè del canton del fuòc. Un mòtle en fonda, presque vièlh coma lo monde…

Fòto : france 3

Fòto : france 3

Lo secrèt : d’uòus de la bòria, de grais d’endura e un molon de biaisses. Per trapar la recèpta, podètz anar sus aqueste site.

Fòto : france 3

Fòto : france 3

Lo Biais de Piget

Piget trobèt aquel Biais mercés a Audrey Ginestet del grop Aquaserge. Es ela que faguèt la mèscla dels Biais sason 1. Los curbelets, ne tastèt mai d’un còp.

Aicí, avèm tot çò que nos cal !

Aquesta frasa que se tròba dins lo sicut marquèt Piget. Vertat es que ja Antoinette et Georges, tot es previst e lor manca pas res. Las consèrvas s’amolan per pas gastar res e sustot per far plaser al monde. Tot un biais de vida tanben !

Lo Biais a venir

Lo 26 d’abrial, al menut :

  • Tisana d’òrdi amb Hélène dins lo Frontonés, una tisana que se beviá en plaça del cafè en temps de guèrra.
Fòto : France 3

Fòto : France 3

  • Las Domaisèlas amb la Bajeleta…

Veidretz çò que son las domaisèlas. Per çò qu’es de la Bajeleta, la coneissètz. Es la Renada, la famosa que Piget filmèt sus 4 sasons e que passèrem dins Viure al País.

Fòto : France 3

Fòto : France 3

Lo Benaset @Benoit1Roux