02 Avr

De collegians de 4ena en plen fantastic !

De collegians, del privat mas sustot del public, que se retròban amassa per una jornada d’escambis, de descobèrtas, e per veire que son pas solets a s’interessar a la lenga d’òc, l’afar marcha totjorn. Dins Tarn, se fa dempuèi 8 ans e aquest’an, èra sonque los quatrens convidats a l’Ostal de la Musica de Cap’Découverte. 160 escolans per una jornada e un tèma : lo fantastic.

Collegians tarneses a Cap Découvertes. Fòto : Lo Benaset

Collegians tarneses a Cap Découvertes. Fòto : Lo Benaset

Los rescontres

Pagats pel Despartament de Tarn, aquestes rescontres se fan en partenariat ambe l’Educacion Nacionala. La Directritz academica dels servicis de l’educacion nacionala Mireille VINCENT butèt la pòrta per encontrar los mainatges. Lo prinicipi es de donar un tèma, que se trabalha en classa, en prevision de la jornada que se declina en talhièrs ont los dròlles viran. Per 2016 èra lo fantastic e La Talvera coma convidat.


Rescontre de collegians tarneses par B. Roux J. Levé M. Blasco MP Duvivier

Présentateurs : Mathis et Kévin  Intervenants : Eric Barthes (professeur) Lilou, Antonin et Lise (collégiens) Philippe Cals (professeur)

Salvajonas, fadas e fantastic

La Talvera fa de collectatge dempuèi 1979, valent a dire que fadas, salvajona e autras bèstias un pauc fantasticas de Tarn an pas de secrèts per ela. Se tòrnan trobar dins las cançons, conferenças e autres contes.

Danièl Loddo aguèt un brave succés ambe sonses contes a l’encòp tradicionals, ambe de tòcas personalas e de duèi.

Mentre que Celina faguèt cantar los enfants en prevision del concèrt de l’aprèp miègjorn, se podiá tanben fintar la mòstra « De la natura de quauquas bèstias » margada pel Cirdoc ambe los textes d’Ives Roqueta e las illustracions de Pierre François, o encara de projeccions comentadas, suls luòcs legendaris de Tarn.

Tot s’acabèt per una brava farandòla…

 

En tornant ambe los carris i aguèt mai d’un collegian content de sa jornada ambe l’enveja de la far partajar a d’amics qu’an benlèu pas l’astre de far causas originalas coma se fan en occitan.

Es pas totjorn fèsta dins los collègis ont se fa d’occitan mas i a encara de braves moments !

Lo Benaset