21 Sep

L’occitan en deuil

La setmana passada, 2 Occitans engajats dins l’aparament de la cultura e de la langa nos quitèron. Claude Bonafous, musicaire de Montanha Negra, CEB, e d’autres (accordéon, graile, …) e Jean Saubrement (escrivan) de la FELCO. Aquí los omenatges de Sòfia Jacques-Serrano e Maria-Joana Verny.

Claude Bonnafous

ADIEU

Claudi Bonafós se n’es anat, s’es pas relevat d’un infart lo 12 de setembre. Es sortit de Vabre dins Tarn d’ont teniá sa lenga rica e sa cultura umanista e universala claveladas al còr.

Musicaire de tria, i aviá pas que el per far ressontir lo graile (autbòi dels Monts de Lacauna) coma aquò, èra tanben crane acordeoniste e cantaire. Sa passion per la musica, la teniá de son amor per sa cultura, mas foguèt tanben enriquida d’influéncias italianas gràcias a sa rencontra amb lo « pifero »,   cosin del graile.

2014 ambe Montanha Negra a la fèsta del papopgay


Membre fondador del grop « Montanha Negra », èra investit dins mantunes grops e associacions ont portava en mai de sa musicalitat, son sorire etèrn, sa gentilesa e son umor occitan sens parièr. Se poiriá escriure un lexic de totes sos biaisses de dire chucoses.

Sèm totes ara orfanèls, Claudi ja te trapam de mens.

Sòfia Jacques-Serrano

3096010001022

Joan Saubrement es estat d’annadas de temps una personalitat màger de l’occitanisme provençal, e totòm sap las dificultats qu’aquò implica, mas que Joan sabiá despassar dins las responsabilitats importantas qu’a occupadas. dins l’IEO de la region Provença, en dialòg, per las emissions de television coma per d’autras accions, amb los mistralencs del Felibritge.

Originari de Lorrena, oficièr de la marina mercanda, aviá maridada Peireta, Provençala membre del Felibritge e s’èra mes a aprene la lenga nòstra amb paciéncia e passion. S’èra format a la paleografia e organizava de talhièrs als Rescontres Occitans de Provença ont sèm quauques uns a la FELCO, Provençals o non, que nos sovenèm de l’aver rescontrat regularament, e sempre amb lo meteis plaser, dins totes los luocs ont se son tenguts.

S’èra mes a escriure e IDECO publiquèt dos libres sieus : D’una mar l’autra en 2009 e D’una guèrra l’autra en 2014.

E los ensenhaires de l’universitat de Montpelhier se sovenon tanben qu’es estat un d’aqueles militants que dins lor practica sabián ja pron causas, mas que consideravan coma important d’o completar en seguissent un ensenhament universitari que l’a menat fins a la licéncia.  L’oblidarem pas e disèm nòstra amistat a Peireta e a sos enfants.

Maria-Joana Verny