23 Juin

Hestiv’Òc 2015

L’estiu arriba e amb el la sason dels festenals. Festen’Òc a Saurat en Arièja lo 27 de junh e del 11 al 13 de julhet, Estivada de Rodés del 22 al 25 de julhet mas tanben Hestiv’Òc de Pau. La programacion del festenal bearnés ven d’èsser desvelada. Per sa onzena edicion, del 20 al 23 d’agost, un seissantenat de companhiás seràn presentas siá prèp de 300 artistas.

 

La novetat d’ongan : un luòc d’espectacle novèl. Atal, l’esplanada de l’Ostal del Departament aculhirà un espectacle de dança contemporanèa Souches de la tropa KD Danse lo divendres 21 a 5 oras del vèspre. « Èra un luòc perfeit per çò qu’es bastiment contemporanèu doncas èra oportun » explica Didier Fois, cofondator del festenal.

Souches - Compagnie KD Danse Photo hestivoc.com

Souches – Compagnie KD DansePhoto hestivoc.com

La dança justament serà mesa a l’onor. « I a ongan encara mai de rendètz-vos dedicats a la dança jos totas sas formas, indica Fanny Larraillet, en carga de la programacion de Hestiv’Òc. Contemporanèa, tradicionala, d’influéncia folclorica, cada jorn i aurà de danças diferentas dins mantun endreits ». Atal, poiretz descobrir l’espectacle de dança de carrièra Neo Kotilun de la tropa KSI (Kultura Sorkuntza Ikerketa) o encara la creacion especiala Pau lo Tiau.

Neo Kotilun - Compagnie KSI Photo hestivoc.com

Neo Kotilun – Compagnie KSI Photo hestivoc.com

La programacion d’ongan pòt foncionar sus 2 axes coma l’explica Fanny Larraillet : « D’en primièr, avèm fach apèl a de valors seguras que coneissèm e que venguèron ja jogar aicí coma Lou Dalfin, La Mal Cofada o encara Bombes 2 Bal. E d’un autre costat, avèm convidat d’artistas de regions e de culturas vesinas d’Occitània » : Bascoat amb Begiz Begi, Brasil amb Rita Macedo Trio, Comtat de Niça amb Mazamorra, Mediterranèa amb Guillaume Lopez e son especacle novèl Medin’Aquí, o encara la Galícia amb lo grop Dakidarria e lor latino-ska alternatiu que pujarà sus la scèna granda dijòus 20 d’agost.

 

Dakidarria Photo hestivoc.com

Dakidarria Photo hestivoc.com

« Dins los moments fòrts, i aurà coma cada annada la dobertura del festenal amb la cantèra giganta que recampa 1000 coristas » nòta Didier Fois. Cantaràn quatre cants : « Bèth Cèu de Pau », « De cap tà l’immortèla », « Aqueras Montanhas » e « La Sobirana ». Una ceremonia que s’acabarà amb lo lançar del berret dempuèi lo balcon de l’Ostal de la Comuna que marcarà la dobertura oficiala de Hestiv’Òc.

Photo hestivoc.com

Photo hestivoc.com

Un festenal 2015 plan ric e complet : musicas, danças, Tamborrada (un passacarrièra de 2 oras amb una banda de mai de 100 musicians), de balètis cada debuta de serada, de talhièrs pels pichons dins l’encastre de « l’Espaci joenessa » lo dissabte e lo dimenge. « Un festenal pels mainatges » que s’acabarà pel Bal en Familha que convidarà los pichons e lors parents a un cors de dança gigant.

Bal en familha Photo hestivoc.com

Bal en familha. Photo hestivoc.com

Se ongan, coma d’autres eveniments e associacions, Hestiv’Òc deu far fàcia a una baissa de la subvencion de la Comunautat d’aglomeracion, la fèsta s’anóncia polida çaquelà. Aquesta annada, espèran 60 000 personas en contacte amb un o mantun moments del festenal.

Sirine Tijani