Mai de 21 000 personas dissabte sus la prada dels Filtres de Tolosa, siti comol tre 8 oras del ser e pas possible de dintrar, un platèu musical de tria, una fèsta populara, Rio Loco regreta pas d’aver fach un pauc de plaça per Occitània.
Un òme : Hervé Bordier
Sortit de Rennes, aqueste Breton es a l’orgina del convit per Occitània. Apelat en 2011 per Pierre Cohen per prene la direccion de Rio Loco, arriba amb de cartons plens : a fargat las Trans Musicales de Rennes, a trabalhat ambe d’artistas tals coma Alain Bashung e coma se dís, coneis la musica ! Sabiá qu’un primièr acte s’èra mancat en 1995 a la creacion del festenal que se sonava alèra Garona. Massilia deviá venir e l’afar se faguèt pas al moment mas pus tard, al Bikini. Reparacion ? Pas sonque.
Lo director coneis plan per exemple lo grop Dupain que passèron per las Trans Musicales. Faguèt donc venir Sam e son grop –sonses grops même estant que Fòrabandit i èra tanben- e los marselheses èron un dels còps de còr d’Hervé. La programacion de dissabte èra modèrna : Guilhem Lopez, Còr de la Plana, Dupain, Massilia, Artús. Una vertadièra capitada. Hervé Bordier aviá pas besonh de convéncer. Se dís ara amorós d’Occitània.
Mai que la serada de dissabte
Dempuèi aquest’an, Rio Loco a metut en plaça çò que sona « les valises ». D’animacions abans lo festenal ligadas als continents e paises que seràn al Rio Loco, amb’ un livròt pedagogic fach per las edicions Milan plan fach per presentar Occitània, sa lenga e sa cultura. Aital de rescontres tanben dempuèi lo 3 de mai dins de salas tolzanas ambe Mauresca, Djé Baléti, En Gaouach, Florant Mercadier, Ange B… De jòcs sus l’endret, d’animacions un pauc occitanas e quitament dissabte de ser, l’anoncia de l’edicion de 2016 (a l’entorn dels Cèltas) facha per una jovenòta en occitan. I agèt lo platèu musical e tot lo demai que mòstra ben un interèst vertadièr cap a Occitània e una dubèrtura ja aqueste festenal.
La participacion occitana
Tre dissabte de matin, bohas confladas, grailes e tamborns caufats, los Bodegaïres units de tot païs & Amassats de Tolosa faguèron l’aubada als tolosencs. De l’ostal d’Assezat cap a lo d’Occitània e lo ser tanben entre lo concèrt del Còr de la Plana e de Dupain. Mentre que Convergéncia Occitana aviá metuda sa bandairòla a la prada dels Filtres, portat una mapa d’Occitània e metut d’afichas « Nòstra region es Occitània » un pauc de pertot.
Joan-Francés Lafont montèt sus l’empont per marcar un pauc lo territòri, anonciar que 2018 seriá l’annada occitana de Tolosa… Un exercici vertadièrament pas aisit ambe d’estuflets e reaccions pas totas amistosas en retorn. Cal ben plan dire que Rio Loco es pas un festenal « militant », pas mai occitan que quicòm d’autre. Lo monde èron venguts per mitat per una brava fèsta populara, l’autra mitat se partaja : un quart per Massilia e l’autre quart per l’occitan en general. De soscar per l’avenidor.
Lo Benaset
