30 Mai

Dàvid Grosclaude : diluns passarem a l’etapa seguenta.

En cauma de la hami dempuèi dimècres de vèspre, Dàvid Grosclaude es en bona santat, totjorn determinat, plan sostengut. Tot lo monde es preste -se l’estat contunha de far la sordanha- tre diluns per anar pus luènh.

Photo facebook

Photo facebook

Dàvid la primièra question, cossí anatz ?

Soi al quatren dia e que va. Sabi plan que va èsser de mai en mai complicat. L’energia va mancar. De deman enlà, un mètge serà ambe ieu per me seguir. Mas me soi preparat dins lo cap. Ai legit de causas sus la question e n’avèm discutit dempuèi un mes ambe ma familha.

 Per de que aquesta mena d’accion e pas una autra ? Es que i a de monde que vos an inspirat ?

Soi un non-violent mas soi pas Gandhi. Ai pas de modèl. Mas auriái pas causit una autra mena de protèsta. Soi un indignat. N’i a pron d’èsser mespresats. Vist los sostens e las reaccions, i a plan monde que pensan aital. Es un signe social e politic : nos sentissèm mespresats.

Vos esperavetz a autant de sostens, d’accions ?

Non. Soi plan susprés. De monde de tot bòrd politic, d’Occitània, d’Espanha, de França… Encara duèi de matin al Conselh Regional d’Aquitània. Lo president Rousset me sosten, se maina de ma santat. De colègas del Conselh Regionau tanben.

Dissabte 30 de mai

Dissabte 30 de mai

2015-05-30 19.08.04

A mai tot aquò, pas cap de responsa del govèrn ?

Dempuèi que soi en cauma, quauqu’un del Ministèri de l’educacion me sonèt, per me dire que las causas s’anavàn destampar. Mas fa un an que me dison aquò ! Lo dorsièr de l’OPLO (Ofici Public per la Lenga Occitana) es plan beroi, trabalhat, complèt, e avem pas de responsa ?! Encontrèri un conselhièr del president Hollande que me diguèt qu’anava transmetre. Aquesta abséncia de responsa es un mesprètz. Lo second mesprètz es rappòrt a las doas assembladas regionalas (Aquitània e Miègjorn-Pirenèus) que votèron a l’unanimitat aquesta creacion de l’OPLO. Representam mai de 6 milions d’estatjants…

Per que l’OPLO siá operacional, cal una simpla signatura de l’Estat ?

Oc-ben ! Cal un arrestat ministerial. Sabem quitament pas de qu’un Ministèri : Educacion ? Cultura ? Interior ?

Cossí se passèt pels autres oficis basc e breton ?

Pel basc, es lo ministèri de l’interior. De Villepin e Sarkozy volguèron reglar l’afar basc.

An finançat tanben l’ofici ? Estant que volguèron pas per l’occitan ?

Gaireben 800 000 euròs per an pel basc. Quand se parlèt de la participacion de l’estat per l’occitan a l’Amassada Nacionala la responsa foguèt negativa. Convenguèrem de lançar l’ofici e de veire de d’aprep se l’estat voliá o pas venir.

E ara, cossí vesètz la seguida ?

Soi estat jornalista. Sabi plan que la mediatisacion se fa sus mai d’un temps. Cal d’elements novèls. Se se desbloca pas, aurem causas d’anonciar diluns. Un recampament se farà sul còp de las 11 oras al Conselh Regionau. N’anam discutir amb lo grop de proches que me sostenon. Anam passar a l’etapa seguenta. Soi pragmatic. Tot se fa pas al medish moment. I a d’etapas. Mas se Paris s’interèssa pas a nosautres aquò va venir.

Entrevista Benaset Roux