23 Jan

Los Occitans de sa majestat 2 : Roger Harvey

Dimenge 25 de genièr, Viure al País èra una emission de tria dedicada als ligams entre Occitans e monde del Reiaume Unit. 

 

Aprèp Patrick Huthinson,  aquí Roger Harvey.

Roger Harvey Fòto : Amic Bedel

Roger Harvey Fòto : Amic Bedel

Lo Roger a Joan Boudou dins las tripas ! Me diretz qu’es normal, pas plan luènh de Naucèla. Normal ? Per un tipe nascut a Londres, plastician, professor de las arts plasticas de l’universitat de Liverpool… ? Benlèu… ! Demorava pas plan luènh de la frontièra ambe Galles quand crompèt un ostal avalit, dins Segala, del costat de Sauvatèrra de Roèrgue ont demòra dempuèi 2006.

Un jorn, alèra que fasia son mercat a Vilafranca de Roèrgue, aquí qu’ausís una lenga que coneissiá pas…L’occitan qu’es aquò ? Urosament, èra dins un país ambe de monde aluserpits coma Padena. Oc-ben, lo Robèrt Marty lo prenguèt jos son bras e i expliquèt. Roger seguís ara los corses de mèstre Padena e a encontrat… Joan Bodon. « De tira, ai agut una estrementida…Me soi dich : es quicòm de bèl, dins la dralha d’un Hémingway o d’un Orwell… Lo libre dels grands jorns me fa pensar al primièr e La grava sul camin al second ».

Alèra Roger se metèt a legir Bodon sens tròp comprene, e a lo revirar en inglés. Cal dire qu’en Anglatèrra pecaire, lo Bodon aviá pas passat las termièras ni mai la Tamisa. Comencèt per revirar de textes en inglés per l’ostal Joan Bodon de Crespin, puèi s’atalèt als libres : Contes del drac, Contes dels Balssa, la mitat del Libre dels grands jorns

Fòto Amic Bedel

Fòto Amic Bedel

Bodon e Roger : tot un poèma

Lo Rogèr a l’uèlh que lusís quand òm li parla dels poèmas de Bodon. « Bodon es pas lo subjèct de çò qu’escriu. Mena la lenga e la redusís à çò d’essencial. Es de concentrat. Aimi fòrça Los carbonièrs de La Sala, Jorn de Fièra, Es sus la Talvera, Sus la montanha» Per el, es una escritura novèla e non pas una revirada. « Vòli revirar coma Bodon auriá escrit en inglés. Caquelà, Bodon coneguèt l’inglés pendent la guèrra. Cresi qu’auriá aimat çò qu’ai fach. Es la seuna filha Jeanine que zo me diguèt ». Aimariá d’acavar las grandas òbras, mas Roger s’arrèsta pas aquí.

Roger e los Boudoumen

Per escampilhar e semenar mai l’escrivan, Roger a fargat los Boudoumen ambe Papillon (que jòga tanben ambe Renat Durand dins Novèl Optic), Jean-François Mariot (l’òme de Mescladis a La Sala). De legidas en inglés, occitan, francés, mesas en musicas e en sons per Papillon. An jogat dos còps a l’Ostal Bodon, a Vilafranca, per la fèsta de las lengas de Najac…

 

Aquí coma una mena d’aperitiu Es sus la Talvera, abans de vos far una bona ventrada dimenge dins Viure al País per un occitan so British !

Lo Benaset