22 Sep

Ràdio País en plena crisi

Nascuda en 1983, Ràdio País -radio associativa occitana- coneis duèi de dificultats de las grandas. Los 6 emplegats an recebut fa dos jorns un corrièr que significa la procedura de licenciament. Una crisi financièra e identitària. Lo blòg occitan tòrna suls eveniments per ensajar de comprene.

 

30 000 euròs de deficit

Los problèmas de moneda son pas novèls. Mas aqueste còp, semblariá que la subrevida d’aquesta  ràdio mai que trentenària siasque menaçada.

En 2013, Ràdio País acaba l’exercici amb un trauc d’aperaquí 30 000 euròs, alèra que tot anava plan en 2012. Duèi seriá  de 42 000…

Lo budgèt de la ràdio es de 260 000 euròs, mai que mai de subvencions de las colectivitats localas (229 000) e mai que mai per la part biarnesa de la ràdio (gaireben 200 000 euròs). Ràdio País es una federacion (fargada en 1996) d’associacions : Ràdio País Bearn, Ràdio País Bigòrra e Ràdio País Gèrs. Las doas associacions de Bigòrra e de Gèrs son un pauc descantidas. « Totes los mejans de la federacion son concentrats sus l’estudiò situat en Bearn », nos ditz Fabrici Bernissan. « Cò de qui priva la radiò de finançaments deus Conselhs Generaus deu Gers e de las Hautas-Pireneas ». Per cambiar las causas, se va far elegir al Conselh d’Administracion lo 24 de mai.

L’amassada generala del 24 de mai

Aquel jorn, los 9 membres del CA (3 per associacions) son a se renovelar. Fabrici Bernissan (Bigòrra) fa sa dintrada. Vòl modificar l’equilibri entre las associacions e reviscolar un pauc Ràdio País Gèrs e Ràdio País Bigòrra qu’a pas mai d’estudiò dempuèi qu’es partida de la Plaça Mercadiu de Tarba e que l’estudiò novèl a calandreta s’es tampat tanben. Met sustot lo nas dins las chifras e lo deficit li fa pensament. Lo tribunal de comèrci de Pau es en alèrta. La banca tanben. Las criticas e las acusacions contra la còla qu’es als afars son violentas. Lo 24 de mai, aquò s’embufa d’un biais grèu. Lo 2 d’agost, Joan-Francés Tisner demissiona del CA. Lo president François Lassabe fa de mème quauques jorns pus tard. Lo burèu novèl de la Federacion es : Christian Villeneuve (president), Miqueu Dantin (vici-president), Pierre Cames (secretari) e donc Fabrice Bernissan lo dinerèr.

Lo 22 d’agost, Domenja Lekuona (qu’es aquí dempuèi la debuta de la ràdio) tòrna metre sas delegacions (programas, subvencions, difusions…) e fa saupre que trabalharà pas pus. Las relacions entre anciana e novèla còla son violentas, las paraulas missantas. Los emplegats son preses dins lo conflicte. Al mes de junh, dos CDD foguèron pas renovelats : una jornalista e un cronicaire.

Un afar de chifras e d’identitat

Per Domenja Lekuona, lo deficit seriá pas lo problèma : aviá presentat un plan d’estalvias de 17 000 euros tre l’AG del mes de mai. D’aprèp ela, lo FSER -fond de sosten de l’estat per las ràdios- deu virar a l’entorn de 70 000 euros (per País Bearn e País Gèrs) d’aici la fin de l’annada. A l’espèra tanben,  un reliquat de subvencions de las regions Aquitània e Miègjorn-Pirenèus. Lo clavaire Fabrici Bernissan es mai pessamentós. Per el, la massa salariala a tròp conflat e la moneda esperada serà pas al nivèl. Tròp d’emplegats ? « Avèm 11 000 euròs per més de massa salariala. Es pas possible » çò ditz Fabrici Bernissan. Per el la matinala comuna ambe Ràdio Occitània « Goog Morning occtània » (GMO) a costat tròp d’argent e d’emplècs. Suspèctada encara, la FIMOC (federacion interregionala dels mèdias occitans) qu’emplèga doas personas e que ne vei pas l’interèst. Per Bernissan, cal tornar a çò qu’èra la ràdio a la debuta : de benevòls per fa d’emission e mai de gascon a l’antena. E de monde que pòdon far tot : l’antena, la tecnica, lo terren. Es a obrar per mutualizar los programas ambe d’autras ràdios coma Radio Galaxy, Radio Couserans, Radio Présence de Sent-Gaudens…

Dins lo dur

Lo 1èr de setembre, la dintrada es fòrça complicada a la ràdio. Los emplegats son en cauma e la situacion es subretenduda. L’emission matinala « Good Morning Occitània » qu’aviá donat de vam als emplegats e de joventut a l’antena es tampada. Los emplegats de Ràdió País an per ordre d’i participar pas. Aqueste jorn « GMO » se fa sonque a Tolosa per Ràdio Occitània… Es totun a l’antena de País lo 1er de setembre. Serà lo darrèr còp. « GMO » contunha sus Tolosa mas sens l’ajuda de País. Aquí la primièira victima.

Un manifèsta es escampilhat, una peticion es lançada per un colectiu de monde que son pas mai a Ràdio País : Domenja Lekuona, François Lassabe (president demissionari) e Joan-Francés Tisner (membre del CA demissionari). Al jorn de duèi 199 personas l’an signada. Anciana e novèla còla se fan la guèrra.

Qu’un avenidor ?

Un acamp es previst aquesta setmana lo 25 de setembre. Lo Credit Cooperatiu (banca de la ràdio) l’a demandat. Segond Bernissan, los fornidors serián pas mai pagats dempuèi un an. Los representants de las colectivitats teritorialas e financièrs son convidats a l’acamp. Darrièra victima : los 6 salariats. Los 3 jornalistas, 2 tecnicians e la comptabla an donc recebuda la letra que prefigura lo licenciament. Semblariá pas que lo novèl burèu volguèsse que siá per de rasons economicas… Los entretens son previstes dijòus de matin. Lo siti internet de la ràdio es tampat e tornarà pas dubrir.

Sèm en plen dins la crisi, e se la situacion contunha, las victimas futuras seràn ben los ausidors.

Benaset Roux