29 Avr

L’Estivada s’en tòrna a Rodés

Dempuèi diluns, lo programa de l’Estivada es donc conegut. Aprèp una cuvada 2013 un pauc saquejada e ventolada, a donc calgut far ambe lo sistèma D o puslèu lo demèrda-te faiçon ÒC. E la ventòrla a talament bufat que tòrna portar lo festenal al còr de la ciutat, sus l’esplanada dels Rutèns per la scèna granda. E coma l’afica novèla es una flor de pissalièch, la grana se va portar un pauc de pertot : al musèu Soulages que serà lèu baptejat, a l’Ostal dels Joves e de la Cultura, a l’amfiteatre e quitament…a l’ostal de la comuna… Per far tornar lo cònse ? Mèfi al pollèn e als estornicals !

Donc alèra aquela programacion? Deja, i a un jorn de mens. L’Estivada se va pausar lo dimècres 23 de julhet e s’acabarà lo dissabte 26. Sens tròp de sòusses (un tèrç del budgèt de mens) a donc calgut comptar sus la solidaritat. Nadau vendrà donc estrenar sonses 40 ans de cançons e segurament que tot serà plen de pertot. Totjorn dins las locomotivas, lo Còr de la Plana s’en tòrna tanben, estant que poguèt pas cantar l’an passat. Luc Aussibal (lo « regional de l’etapa ») serà el tanben de la partida. S’ameritava ben l’empont bèl, el que tòrna amb una còla novèla encara mai ròck.

Teaser Estivada edicion 2013

E tomba plan. Que lo menut de 2014 serà encara mai ròck, punk, ska. Menat pels Goulamas’k que venon de sortir un disc novèl, auretz tanben Sonoloco un grop de Lemosin reconegut dins lo mitan Hard Ròck. Lo mème jorn, Papà Gahús vendrà far la pròva que Bigòrra es pas en rè sus aquela musica. Autant dire que lo dissabte, la clavadura de l’Estivada serà negra, brusenta e bolenganta !

Al menut de dabans, Xarnège, basques e biarneses, elses tanben amb una produccion novèla, Pythéas lo gròp de Lou Dàvi qu’èra ja vengut o los bretons al nom que fa enveja : Les Ramoneurs de Menhirs. L’espectacle se farà tanben per carrièra ambe un desfilat de bandas per l’inauguracion, la granda banda occitana de las Valadas (lo dijòus) e al musèu Soulages en debuta de jornada per de cartas blancas dedicadas a Pierre François, Marie Rouanet o encara lo projèct de Joan-Francés Tisner : NY’ÒC Trobadors. Sens oblidar de teatre. I aurà de que far. Sul siti de l’Estivada i a un « teaser » per vos far despacientar ambe l’edicion de l’an passat.

Aqui lo sicut qu’aviam fat dins lo jornalet al més de febrièr.

 

Coma dirián Patríc Roux e Lo Dalfin : sèm encara aicí. A mai de 20 ans, lo festenal demòra a Rodés. Mudada, menaçada, de còps que i a criticada e pas rancurosa ambe las colectivitats aveironesas, l’Estivada contunha son camin a Rodés, benlèu un jorn endacòm mai. Es ara pron bèla. L’essencial es de s’en passar pas!

Benaset Roux